Ότι δεν με σκοτώνει με κάνει πιο δυνατό


jueves, 23 de agosto de 2012

¿Cuéntote un cuentu n´asturianu?







Güei déxovos equí esti cuentu n´asturianu escritu per un xoven escolín, col enfotu que vos preste´l testu asgaya.




LA CABRA BERMEYA Y LES PITES PINTES


Rodrigo Valdés García




Yérase una vez una cabra bermeya, llamábase Nalda, y tenía un maríu llamáu Belardu. Yeren una especie de llabriegos, teníen un corral llenu de pites pintes, vaques casines, gochos celtes y tamién una granxa llena de pataques xaponeses, calabaces llanisques, zanahories de Castiella y cebolles rellenes.


De xuru, lo que más-y gustaba a Belardu yeren les pites pintes, pero non cuidales, non, lo que-y gustaba yera comeles, comía y comía per elles como un descosíu… En cambiu Nalda yera vexetariana, ella cuidaba’l güertu y Belardu´l corral.


Un dí l´home fexo un esperimentu pa conseguir que les pites fueren más grandes, más grandes, asina tendría más comida, atalantaba él. Con la primer pita que probó llamábase Sunta, pero en vez de crecer un poco convirtióse en pocos segundos nun monstruo de 20 metros que miraba pal amu con una cara como de querer mordelu peles oreyes. Belardu empezó a correr y a gritar, pero Sunta garró la poción y echólo a toles sos compañeres, les otres pites. Toes se convirtieron, enseguida, en monstruos.


Nalda, namás enterase de lo que pasare, garró la moto y salvó a Belardu. Depués llamaron al exércitu, a la Policia, etc. Pero les pites monstruo nun morríen. Entós llamaron a Quirón, al Minotauru, al Cuéllebre, a Polifemo y a la Hidra. Llucharon y llucharon, pero les estrañes pites nun morríen.


Entós a Belardu entró-y  una idea na cabeza: busca-yos a esos bichos el puntu débil. Diose cuenta de que'l puntu débil tenía que ser Conocimientu del Mediu, la materia más difícil de la escuela. Belardu garró un altavoz y preguntó-yos a los monstruos:


¿De qué ta formáu el tubu dixestivu?
¿Qué son les glándules salivales?


Y, como per arte de maxa, aquellos seres diben perdiendo fuerza y fuerza cada vez que nun yeren a responder a les preguntes. Cuando Belardu-yos fexo la última pregunta: ¿pa qué valen los alvéolos pulmonares?, los monstruos cayeron de rodilles rendíos, agotaos. Y fue cuando dixeron: Val, dexámosvos en paz con tal de que esti nun coma pites pintes.


Belardu acetó.




Y collorín colloráu isti cuentu ta acabáu.